Tá graslíkið varð skift á vøllinum við Løkin í fjør, varð gamli vøllurin skorin í petti og tikin av og nakað seinni fluttur út til fleiri av sparkivallunum í kommununi.
- Fleiri av gomlu vøllunum høvdu svart gummigranulat, og tað hevur í nógv ár verið eitt ynski at fáa aðrar vallir. Samstundis skuldi gamli vøllurin við Løkin beinast burtur, so ella so.
Í Runavíkar kommunu siga tey, at heldur enn at tyrva ella brenna gamla graslíkið, varð gjørt av at royna at endurnýta graslíkið í tann mun, tað bar til.
- Fyrsta royndin er um dagarnar gjørd á sparkivøllinum í Søldarfirði.
Lagt verður aftrat, at taekwondofelagið, Hwarang Føroyar, sum mangan roynist væl, tá uppgávur skulu loysast skjótt og væl, tók eisini hesa uppgávuna á seg - at leggja gamla graslíkið út og líma tað.
- Vøllurin í Søldarfirði er nú nærum klárur at brúka aftur og nú við grønum granulati.
- Í framtíðini kunnu børn og vaksin í økinum tí spæla á sama graslíkinum, sum í eini níggju ár var álitið hjá hetjunum við Løkin, siga tey í Runavíkar kommunu.
