- Hvar eru klokkukláru mannagongdirnar og gjøgnumskygni?
Tað er ein av spurningunum, sum Marjus Dam, fyrrverandi løgtingslimur, setir í brævi, sum hann hevur sent miðlunum í kvøld.
Í brævinum vísir hann til løgtingslóg nr. 14/2002, har hann metir, at tað soleiðis stendur klokkuklárt (sitat):
"Tá ein undirsjóvartunnil so verður tikin í nýtslu, stendur viðkomandi partafelag fyri rakstrinum, líka til lánið í tunlinum er afturgoldið. Tá lánið er afturgoldið, verður partafelagið upployst, og undirsjóvartunnilin fellur til landið sum ein vanligur partur av landsvegakervinum".
- Fyri okkum vanligu deyðiligu, er einki at ivast í, hvat stendur. Men hjá landstýrismanninum í samferðslumálum stendur nakað annað, enn øll onnur síggja so sera greitt.
Fyrrverandi løgtingsmaðurin spyr tí, um Henrik Old er settur at útinna tað, ið løgtingið hevur samtykt - ella, um landsstýrismaðurin er oman fyri lógina.
