Ein talsmaður fyri pólsku stjórnina skrivar á X sambært AFP.
- Klokkan 11 luttekur Donald Tusk, forsætisráðharri, í enn einum práti við evropiskar leiðarar, har evnið er Ukraina, skrivar talsmaðurin Adam Szlapka.
Fundurin kemur eftir, at amerikanski forsetin, Donald Trump, sunnudagin fekk vitjan av ukrainska starvsbróðuri sínum, Volodymyr Zelenskyj.
Her umrøddu tey eina friðarætlan fyri Ukraina.
Fundurin fer eisini fram í kjalarvørrinum av russisku ákæruni um, at Ukraina hevur lopið á bústaðin hjá russiska forsetanum, Vladimir Putin. Ein ákæra, sum Ukraina hevur víst aftur.
Pólski tíðindamiðlin TVN 24 skrivar, at væntandi fer Mette Frederiksen forsætisráðfrú Danmarkar at luttaka fyri Danmark. Sama er galdandi fyri ríkis- og stjórnarleiðarar í londum sum Týsklandi, Fraklandi og Italia, skrivar TVN 24.
Miðilin leggur afturat, at leiðararnir fara at tosa í telefon.
Ritzau roynir at fáa váttað frá forsætismálaráðnum, um Mette Frederiksen luttekur á fundinum.
Áhaldandi samráðingar á høgum støði hava verið í heyst um at fáa enda á krígnum í Ukraina, sum hevur verið í næstan fýra ár.
Sunnudagin hittust Trump og Zelenskyj í fleiri tímar á bústaðnum Mar-a-Lago hjá Trump í statinum Florida.
Eftir fundin søgdu bæði amerikanski og ukrainski forsetin, at stór framstig vóru gjørd við at fáa enda á krígnum í Ukraina.
Tað var tó ikki greitt, hvør framgongd var, og heldur ikki vóru nøkur tíðindi um, hvussu langt burtur tey eru komin frá eini veruligari friðaravtalu.
Mánadagin segði Zelenskyj sambært Reuters, at uppskotið til friðarætlan krevur, at USA skal veita trygdarváttan fyri Ukraina í 15 ár.
Hann hevði sjálvur biðið um trygdarváttan í upp til 50 ár á fundinum við Donald Trump.
Hinvegin hevur Russland kravt at varðveita eysturpartar av Ukraina, og Russland hevur eisini sagt, at Ukraina ikki skal kunna gerast limur í NATO verjusamgonguni.
/Ritzau/
