Beinleiðis ferðirnar hjá Atlantic Airways til Barcelona, Mallorca, Kreta og Lissabon tykist at vera tað heilt stóra millum føroyingar hetta summarið. Tað siga føroyska ferðaskrivstovurnar, ið Vikuskiftis-Sosialurin hevur tosað við. Serliga er tað Barcelona, ið Atlantic Airways flýgur beinleiðis til sætta árið á rað.
- Mítt uppáhald er, at Barcelona er akkurát líka umtókt sum fyrsta árið. Tað eru enntá fólk, ið fara tvær ferðir um árið, sigur Sakaris Frederiksen, sølu- og marknaðarstjóri á Fonn Flog.
Tí tekur Bergur Thomsen, stjóri á 62N undir við.
- Tað búgva bara 50.000 fólk í Føroyum, men Atlantic Airways flýgur eina ferð um vikuna til Barcelona í eitt hálvt ár. Tað er øgiliga nógv, men tíðirnar eru góðar, og fólk ferðast ikki bara eina ferð um árið, men fara gjarna á fleiri ferðir, sigur Bergur Thomsen, stjóri á 62N.
Í vikuskiftisblaðnum, ið fæst til keyps í handlunum í kvøld, og verður borið fríggjadagin, ber til at lesa meira um hvar føroyingar velja at brúka summarferiuna uttanlands.
