Stóra familjutiltakið hjá TB, Tvøroyrar Bóltfelag, sum skuldi verða í miðbýnum á Tvøroyri í dag, er flutt inn í ítróttahøllina í Trongisvági.
Hetta tóku fyriskipararnir avgerð um, nú veðurforsagnirnar eru so ivasamar, og veðrið gjørdist heldur keðiligt til eitt uttanduratiltak í dag.
- Vit tóku eina spontana avgerð um at skipa fyri einum familjutiltaki á Tvøroyri, sigur leiðslan í TB.
Á Tvøroyri halda tey tað vera upplagt at skipa fyri einum slíkum degi, soleiðis at bæði lokal, ferðandi og onnur kunnu hava okkurt at fara til saman við børnunum.
- Tí vóna vit at síggja nógv fólk í ítróttahøllini í dag í tímunum frá klokkan 14-17, og øll eru hjartaliga vælkomin.
Í Tvøroyrar Bóltfelag siga tey, at felagið bjóðar ókeypis vafflur, slush-ice, poppkorn, te og kaffi.
- Eisini verður møguligt at keypa lutaseðlar til tombola og nøkur spøl til eydnuhjólið, og her eru nógvir góðir vinningar at vinna.
Vit kunnu leggja aftrat, at á familjutiltakinum verður bamsutombola við einari ørgrynnu av bamsum.
Í eydnuhjólinum eru fimm gávukort á 1000 krónur og eitt á 2000 krónur at vinna.
- Gávukortið á 2000 krónur hjá Hotel Hafnia kann eisini brúkast á ólavsøkubuffe'ini hjá teimum í ár, siga tey í Tvøroyrar Bóltfelag, sum skipa fyri stóra familjudegnum í Trongisvági í dag.
##med2##
##med3##
##med4##
##med5##
##med6##
