Setur.fo:
Magni Mohr, professari í ítróttafysiologi á Fróðskaparsetri Føroya, og Mark Lausen-Marcher frá Hondbóltssambandi Føroya hava útgivið eina oddagrein ella “editorial” í vísindaliga tíðarritinum, Scandinavian Journal of Medicine and Science in Sports.
Greinin er skrivað saman við kendum ítróttagranskarum í Danmark, Portugal og Italia, og ber heitið “Need for Speed? Men´s Team Handball in the Future: Preparing Players, Coaches and Staff for the Evolution”.
Ein oddagrein í einum vísindaligum tíðarriti setur vanliga sjóneykuna á okkurt umskiftiligt ella á eitt paradigmuskifti. Tá talan er um hondbólt, hevur allur ítróttaheimurin seinastu árini kjakast dúgliga um, hvussu tað ber til, at vit í Føroyum við okkara 55.000 fólkum og 3000 virknum hondbóltsspælarum kunnu hava landslið, sum í longdini standa seg so væl á altjóða pallinum.
Magni Mohr, sum hevur tikið stig til greinina, helt at føroyska hondbóltsævintýrið er so serstakt, at tað átti at verið viðgjørt vísindaliga eisini.
- Eg tosaði so við Mark og Hondbóltssambandið, umframt nakrar av mínum starvsfeløgum uttanlands, um at brúka føroyskan manshondbólt sum dømi ella “case” fyri møguligum broytingum í hondbóltsspælinum. Tað vil siga at seta spurningin, um spælið verður skjótari og øðrvísi, tí so broytast eisini krøvini til framtíðar hondbóltsspælaran. Her eru Føroyar og HSF áhugaverd, tí tey hava kanska hugsað nakrar tankar, og útint teir í verki, áðrenn onnur størri lond og eru tískil við til at mynda eina broyting í ítróttagreinini, sigur Magni Mohr.
Við íblástri frá føroysku landsliðunum viðger greinin, um spælarar í ávísum leiklutum, serliga á bakkplássunum, fáa ein øðrvísi profil, sum ger teir so sterkar í gjøgnumbrotsspælinum, heldur enn bara at kunnu skjóta úti frá.
Mark Lausen-Marcher frá Hondbóltssambandi Føroya er errin av, at føroyskur hondbóltur og føroyskir leikarar kunnu geva íkast til altjóða kjakið um menningina av ítróttini.
- Hetta ber prógv um, at miðvís menning av evnum og sterkir felagsskapir kunnu skapa úrslit, eisini í einum lítlum landi, sigur hann.
- Samstundis er tað týdningarmikið, at granskingargrundað vitan verður framleidd um hondbóltin, so vit betur kunnu skilja menningina av spælinum og laga okkara praksis til. Í Hondbóltssambandi Føroya vilja vit hava eina nýskapandi tilgongd til ítróttina og geva okkara íkast til at mynda framtíðina hjá hondbóltsspælinum, sigur Mark Lausen-Marcher.
Greinin lýsir eisini hagtøl frá øllum størri altjóða kappingum hjá monnum seinastu umleið 20 árini. Og har er eitt greitt mynstur. Lið skjóta og skora nógv minni við skotum úti frá enn fyrr, og tey royna í nógv størri mun við skjótum og gløggum gjøgnumbrotum at koma tættari upp á málið hjá mótstøðuliðunum. Hetta gevur eisini størri sannlíkindi fyri at skora mál ella eitt betri xG.
Eisini verður víst við dátum frá dystargreiningum av rennimynstrum, at ferðin er munandi hægri í dag enn fyrr. Hetta økir um vandan fyri tí slagnum av møði, sum mennist, tá ið ein endurtekur intenst vøddaarbeiði uttan nóg langa hvíld ígjøgnum dystin. Her verður eisini kjakast um, hvussu útskiftingar kunnu fremjast munadyggari fyri í mest møguligan mun at hava frískar spælarar á vøllinum sum longst.
Alt hetta hevur longu broytt spælið, men sannlíkt koma skjótleiki í rørslum, fatanarevnum og avgerðum, umframt gjøgnumbrotseginleikar at vera sera avgerandi í framtíðar hondbóltsspælinum.
Hetta fer at ávirka flestu økir av hondbóltsspælinum frá venjing og talentmenning til dystarfyrireiking og taktik.
Oddagreinin endar tískil við dømum um, hvussu hesar broytingar fara at ávirka tey, ið til gerandis arbeiða í hondbóltsumhvørvinum.
Greinin kann lesast her.
