Norð Festivalur - ella Føroya vakrasti festivalur, sum hann eisini verður róptur - verður nú hildin á Viðareiði á triðja sinni.
Seinnapartin í morgin og í annaðkvøld verða tey nógvu konserttiltøkini, har DoDo & the DoDo’s verður millum høvuðsnøvnini, og tey fara á pallin í annaðkvøld klokkan 21.30.
Á Viðareiði verður tónleikur á tilsamans trimum pallum.
Hóast fyrstu konsertirnar ikki verða fyrr enn seinnapartin í morgin, merkir tað ikki, at fólk fara at keða seg í bygdini - hvørki í kvøld, ei heldur í morgin, áðrenn fyrstu konsertirnar verða.
Í kvøld verður hugnaløta og felagssangur á Hotel Norð við Jóanisi Erik Køtlum, Eyðuni Hansen, Eyðuni á Lakjuni og Dávuri Heinesen á harmoniku.
Tónar fara eisini at spæla til dans í kvøld frá klokkan 22, og hugnaløtan er ætlað sum eitt tiltak fyri festivalgestum.
Dagurin í morgin byrjar longu klokkan 10 við ókeypis morgunmati fyri øllum gestum, áðrenn Trølla Pætur og Omman fara at undirhalda fyri børnunum í stóra tjaldinum klokkan 11.15.
Spælilandið, sum er skipað í samband við Norð Festivalin, letur upp á middegi í morgin, og klokkan 12.30 í morgin fara viðingar, eins og gjørt hevur verið hini bæði árini, at fletta eina kúgv.
Á Hotel Norð letur eisini ein vælsmakkandi buffét upp í morgin klokkan 15.
Leygardagurin seinnapart og til langt út á sunnunáttina verða nógvar ymiskar tónleikaframførslur, har Uni Debess leggur fyri á terassuni klokkan 15, og seinasta konsertin verður við Adrenaline á stóra palli klokkan 02.30.
Niðanfyri eru nakrar myndir, sum eru tiknar á undanfarnum festivalum á Viðareiði, og tað er eingin loyna, at vakrari umstøður til eitt slíkt tiltak enn tær á Viðareiði eru truplar at finna í Føroyum.
##med2##
##med3##
##med4##
##med5##
##med6##
##med7##
##med8##
