Ein ógvuslig spreinging hevur í dag rakt eitt shiamuslimskt øki í høvuðsstaðnum í Afganistan, Kabul.
Tað skrivar fleiri lokalir miðlar sambært tíðindastovuni Reuters.
Tað er annar dagur á rað, at økið í Kabul verður rakt av álopi, sum krevur mannalív.
Í minsta lagi tvey fólk doyðu í dag, og onnur 13 fingu skaða. Í gjár doyðu átta fólk, og nógv fleiri vórðu særd.
Hernaðarligi bólkurin Islamskur Statur (IS) hevur tikið ábyrgdina av báðum álopunum.
Tað er eitt øki i vestara parti av afganska høvuðsstaðnum, sum seinastu tveir dagarnar hevur verið málið fyri álopunum hjá IS. Økið hýsir fleiri shiamuslimum, sum eru ein átrúnaðarligur minniluti í Afganistan.
Shiamuslimarnir eru í ferð við ársins størstu hátíð. Teir eru í heilaga mánaðinum Muharram, sum er í hásæti við Ashurainum.
Ashurain er tann týdningarmesti dagurin í árinum hjá shiamuslimum.
Hann verður hildin til minnis um imamin Hussein Ibn Ali, sum doyði martyrdeyðan í tí, sum í dag er Irak. Imamurin var abbabarn hjá profetinum Muhammed.
Talibanrørslan tók yvir stjórnarvaldið í Afganistan fyri skjótt einum ári síðani – tann 15. august í 2021. Síðani tá hevur IS herjað landið við fleiri álopum, sum hava kravt mannalív. Tey hava fyrst og fremst verið vend ímóti átrúnaðarligum minnilutum.
/ritzau/
