Fyrrverandi forsetin í Kongo, Joseph Kabila, er dømdur til deyða av einum hernaðardómstóli í landinum.
Tað veit tíðindastovan AFP at siga í kvøld.
Rætturin heldur, at fyrrverandi forsetin er sekur í eitt nú landasviki, krígsbrotsverkum og píning.
Sagt verður, at Joseph Kabila var ikki í rættinum, tá dómurin fall, og miðlarnir vita ikki at siga júst, hvar hann er.
Le Monde skrivar, at fyrrverandi forsetin vísti seg alment í mai í økjum í Kongo, har hernaðarbólkurin, M23, hevur valdið.
ST sigur, at M23 verður stuðlaður úr Rwanda. Joseph Kabila var forseti í Kongo árini 2001 til 2019.
- Flokkurin hjá fyrrverandi forsetanum sigur, at rættargongdin hevur verið politisk, veit Le Monde at siga.
