Hagafelagið hevur nú gjørt nøkur góð hagaráð fyri føroyingar at ferðast trygt og virðiliga í haganum. Ráðini snúgva seg um trygd og at vísa fyrilit fyri náttúruni. Endamálið er at vegleiða fólk um góðar vanar og atburð, tá ið farið verður út í hagan.
Hagaráðini eru hesi:
- Kanna veðurforsøgnina og sig øðrum, hvar tú fert. Hav eina plan B, um veðrið versnar, ella vend aftur.
- Vel túr eftir førleika. Gakk ikki longri ella hægri, enn tú megnar og hav hóskandi steðgir.
- Brúka gangiskógvar/-stivlar við góðum sporum.
- Hav vatn, mat/søtt, húgvu, hóskandi klæði og lødda fartelefon við. Til langar túrar er best at hava eyka klæði og orkubanka við.
- Fylg leiðum og merkingum – har hesar eru tøkar. Fá tær kort-app á fartelefonina til at finna og gera slóð.
- Lat hagaportur aftur eftir tær og far væl um hegn.
- Tak alt rusk við tær aftur og savna, um tú finnur nakað.
- Lat seyð, fugl og plantur fáa frið. Vís fyrilit fyri virkseminum í haganum.
- Far ikki ov nær brøttum homrum ella út á eggina.
Umframt góða hjálp frá royndum fjallafólkum í Føroyum hevur Hagafelagið eisini leitað sær íblástur til hagaráðini í grannalondunum, har vegleiðingar til fólk at ferðast skynsamt í náttúruni eru vanligar. Mest kendar eru helst Fjellvettreglerne í Noregi, har sterk siðvenja er fyri at leita sær út í náttúruna.
Hagafelagið vónar at fólk taka væl undir við hagaráðunum og ynskir øllum eitt gott summar.
