Skála hevur sett 48 ára Michael Bjørn Nielsen sum nýggjan fulltíðarvenjara. Hann hevur A-venjaraprógv og hevur verið venjari hjá B 1909 í Danmarksseriuni, men hetta er fyrsta fulltiðarstarvið hjá honum.
- Eg skal verða erligur og siga, at eg ikki kenni so nógv til føroyskan fótbólt, og tað havi eg ongantíð fjalt útyvir. Heldur ikki í samrøðunum við Skála. Mær er fortalt, at føroyskur fótbóltur er eitt stað í millum næstbestu deildina í Danmark og Danmarksseriuni, sigur Michael Bjørn Nielsen við bold.dk.
Hann hevur ikki verið venjari fulltíð fyrr, men hann hevur roynt nakrar líknandi støður í B 1909, sum Skála er í.
- Í B 1909 høvdu vit spælt í Fynseriuni í nøkur ár og vunnið fleiri dystir, men tá vit komu í Danmarksseriuna máttu vit umstilla okkum. Vit fingu bara tvey stig í sjey teimum fyrstu dystunum, men høvdu 18 stig eftir 14 dystir, sigur Michael Bjørn Nielsen.
Hann sigur eisini í samrøðuni, at tað verður ongin innrás av spælarum frá B 1909, men sær hann ein spælara, sum passar væl til, so er møguleiki at onkur spælari verður kontaktaður. Michael Bjørn Nielsen skal eisini hyggja nærri at ungdóminum á Skála, so felagið fær mest møguligt burturúr ungdóminum.
Michael Bjørn Nielsen hevur gjørt ein eitt ára sáttmála við Skála og byrjar í starvinum 1. feburar. Skála vann í gjár 2-0 á AB í fyrsta umfari í venjarakappingini hjá Venjarafelagnum, VFF Kup.