Í Suður-Føroyum arbeiða færri fólk enn norðan fyri

Tað er ordiligt glopp ímillum Sandoynna og Suðuroynna, og so restina av landinum

Sum vit skrivaðu í áðni er nógv størri partur av føroyingum ímillum 15 og 74 ár til arbeiðis enn tað eru í øðrum londum. Serliga eru føroysku kvinnurnar í eini serstøðu afturímóti kvinnunum í øðrum londum.

 

Les meiri her: Føroyingar arbeiða longri enn nakar annar

 

Hetta vísir ein uppgerð hjá Hagstovuni. Men uppgerðin vísir eisini, at tað er rættiliga stórur munur á, hvussu nógv fólk eru á arbeiðsmarknaðinum í teimum ymsu pørtunum í landinum.

 

Uppgerðin vísir, at tað er í Streymoynni, bæði í Norðstreymoy og í Suðurstreymoy, at tann størsti parturin, ella 85 prosent, av teimum 15-74 ára gomlu, eru á arbeiðsmarknaðinun.  Eitt vet aftanfyri er Eysturoy, har 84,2 prosent av teimum 15-74 ára gomlu eru á arbeiðsmarknaðinum, og beint aftanfyri eru Norðoyggjar, har sløk 82,9 prosent eru á arbeiðsmarknaðinum. Støðan er at kalla tann sama í Vágum, har 82,6 prosent av teimum 15-74 ára gomlu eru á arbeiðsmarknaðinum. 

 

##med2##

 

Men so er eitt glopp til tann syðra partin í landinum, tí í Suðuroynni eru 78,6 prosent av teimum 15-74 ára gomlu á arbeiðsmarknaðinum. Og í Sandoynni er tað 75,6 prosent, sum eru á arbeiðsmarknaðinum, ella 9,4 prosentstig minni enn í Streymoynni.

 

Tað er eisini í Suðurstreymoy at munurin ímillum kynini er minst, tí har er hann 1,7 prosentstig, men aðrastaðni er hann runt roknað, eini fýra prosentstig.