Í dag er reyð ávaring fyri áarføri í spanska høvuðsstaðnum, Madrid, og borgarstjórin heitir á íbúgvarnar í býnum um at halda seg við hús.
- Orsakað av sera sjáldsomu støðuni, har útlit eru til, at vit fara at seta met í regni, heiti eg á fólk í Madrid um ikki at fara út í dag.
Soleiðis skrivar borgarstjórin í Madrid, Jose Luis Martinez-Almeida, á X, sum áður kallaðist Tvitter.
Tað er tíðindastovan, Reuters, sum endurgevur borgarstjóran.
Sagt verður, at reyða ávaringin er galdandi fyri regiónirnar, Madrid, Toledo og býin, Cadiz.
Myndugleikarnir í Madrid hava eisini sent út tekstboð til íbúgvarnar, har ávarað verður um floym.
Heitt verður eisini á fólk um at lata akfør standa og ikki at fara út at koyra í spanska høvuðsstaðnum í dag.
LaLiga-dysturin millum Atletico Madrid og Sevilla, sum skuldi leikast í Madrid í dag, er avlýstur vegna veður, veit Reuters at siga.
Ringa veðrið og oysregnið gera eisini um seg fleiri aðrastaðni í Spania í dag, sum vit helst fara at hoyra meira um seinni í kvøld.
