Kanada fer í dag at kunngera, hvussu landið fer at svara nýggju tollsatsunum hjá amerikanska forsetanum, Donald Trump.
Tað stendur á heimasíðuni hjá kanadisku stjórnini.
Fíggjarmálaráðharrin, François-Philippe Champagne, og fleiri aðrir ráðharrar fara á tíðindafundi í høvuðsstaðnum Ottawa at greiða frá svarinum hjá Canada.
Tíðindafundurin verður klokkan 16 føroyska tíð.
Sambært stjórnini snýr tað seg um nýggj tiltøk, sum skulu verja og stuðla kanadiskum løntakarum og fyritøkum í hesum truplu tíðum.
Enn er ikki greitt, júst hvørji tiltøk verða løgd fram.
Kanada og USA komu fríggjadagin ikki ásamt um eina avtalu, sum kundi forða fyri nýggju amerikansku tollsatsunum á 50 prosent á ávísar kanadiskar vørur. Tað var hóast fleiri vikur við samráðingum.
Tollsatsirnir komu í gildi leygardagin, og Kanada boðaði síðani frá ætlanum um at seta revsitoll á amerikanskar vørur.
Mánadagin segði Donald Trump eisini, at tollurin á kanadiskar bilar verður tvífaldaður upp í 50 prosent frá næsta ári.
Eftir at hava víst einari avtalu aftur, sum hann kallaði vánaliga, boðaði kanadiski forsætisráðharrin, Mark Carney, frá revsitolli á amerikanskar vørur. Tann tollurin kemur í gildi 8. september.
Tollurin verður serliga vendur móti amerikanska stál- og mjólkaídnaðinum, men fer eisini at fevna um landbúnaðarmaskinur, pappír og elektronikk.
Mark Carney segði mánadagin, at endamálið við handilssamráðingunum altíð hevur verið at tryggja kanadifólki bestu avtaluna – og ikki eina avtalu fyri ein og hvønn prís.
– Undir samráðingunum sóu vit, at amerikanararnir vildu oyðileggja okkara stóru vinnugreinar, teirra millum bil-, stál- og aluminiumsídnaðin, við órímiligum samráðingarkrøvum. Tað er ein høvuðsorsøk til, at vit søgdu nei, segði hann.
USA er størsti handilssamstarvsfelagin hjá Kanada. Umleið 70 prosent av samlaða kanadiska útflutninginum fer til USA.
Kanada er í ár næststørsti handilssamstarvsfelagin hjá USA, tá ið hugt verður at vøruhandli. Bert Mexico er frammanfyri.
Ritzau/AFP
