Tað eru tvey lið, sum ikki megnaðu tað leygardagin, ið tey høvdu vónað, sum hittast við Løkin í Runavík íkvøld.
NSÍ var partur av málleysum javnleiki í Trongisvági, eftir at tað næstseinast endaði við heimatapi ímóti Skála:
NSÍ liðformaðurin, Klæmint A. Olsen, heldur, at hann og liðfelagarnir skylda fjepparunum og sær sjálvum ein virðiligan enda á kappingarárinum:
-Vit spæla fyri at vinna hvønn dyst og harvið eisini tann íkvøld. Avrikið í Suðuroy var í verjupartinum munandi betri, enn tað var ímóti Skála. Nú ræður um at fáa álopsspælið at rigga aftur.
Leygardagin var Árni Frederiksberg eftir langan skaðasteðg á vøllinum síðstu løtuna. Hann fer at hava størri leiklut í kvøld.
Í HB kendist tað sum stórt vónbrot, tá ið tað í staðin fyri sigrinum, sum heimaliðið í Gundadali stríddist fyri at vinna, endaði við 2-1 tapi ímóti FM biðlunum í Víkingi, sum skoraðu sigursmálið stutt undan leikloki.
HB er átta stig aftanfyri B36, sum er á bronsuplássi og harvið í løtuni hevur atgongumerkið til europeisku kappingina í hondini. Kortini vil HB venjarin Sigfríður Clementsen ikki heilt avskrivað møguleikan at sleppa upp í part í Europa næsta summar:
-Vit spæla framvegis fyri at vinna hvønn dyst. Um vit gera tað, so fáa vit at síggja, hvussu hini úrslitini laga seg. Liðið er í menning. Um HB ikki vinnur seg í Europa í ár, so verður tað næsta ár. Vit hava fleiri blaðungar spælarar á liðnum, sum spæla nógv og harvið fáa størri ábyrgd, sigur HB venjarin Sigfríður Clementsen.
