Løstir - ein leikur um sálarsjúku og at finna fótafestið eftir Bárði Persson og Barbaru Hesselager.
Hetta eru forteljingar um ikki at passa inn. Um at kenna seg frávaldan í eini skúlaskipan, ið ikki megnar at lofta tær. Um sjúku, sum kemur sníkjandi. Um at missa seg sjálva. Um at liggja krúllaður undir eini dýnu og vera sannførdur um at vera fullkomiliga miseydnaður. Hetta eru forteljingar um at berjast fyri lívinum. Um at eydnast og aftur at finna ein veg úr myrkrinum.
Bárður og Barbara hittust fyrstuferð í 1998, tá tey bæði sluppu inn á statsgóðkenda sjónleikaraskúlan í Aarhus Teater. Tey næstu fýra árini skuldu tey í holt við sína dreymaútbúgving. 20 ár seinni hittast Bárður og Barbara aftur og finna útav, at umframt at hava leiklistina í felag, eru eisini aðrar lívsupplivingar, sum tey bæði hava til felags.
Leikurin varð fyrstuferð framførdur í Norðurlandahúsinum í mai 2024 og verður nú enduruppsettur í Løkshøll. Hann er 70 minuttir til longdar.
Atgongumerki fáast fyri 240 kr. (+10 kr í avgjaldi) Lesandi og fyritíðarpensjónistar gjalda 120 kr. (+10 kr í avgjaldi)
Toymi
Ria Tórgarð, leikstjórnað og evnað leikin til
Bárður Persson, leikrit og leikari
Barbara Hesselager, leikrit og leikari
Billa Jenný Jónleifsdóttir, pallmynd, búnar og grafikkur
Villiam Soo Joensen, ljóssnið
Andreas Samuelsen, Bjørg Clementsen, Gunnvá Winther, Monika Hjelm Joensen, Rebekka Rafael: Pallhjálparfólk, næmingar, læknar, sjúklingar, heksir, tannagríslarar, dansarar og trummusláarar
Gunnhild Persson, framleiðsla og samskipan
Stuðlað verkætlanini hava
Almanna- og mentamálaráðið
Sinnisbati
Betri Trygging
MEGD
Fólkini handan verkætlanina vóna, at leikurin kann vera við til at skapa eina samrøðu um tabuevni og varpa ljós á, hvussu týdningarmikið tað er, at vit gerast betri til at tosa opið um at stríðast sálarliga.
