Bónuskappingin, menn:
Megnar Fleyr aftur at taka SÍ á bóli í hálvfinaluni í steypakappingini?
Tað er spurningurin, nú hálvfinalurnar í Bónus steypakappingini í flogbólti hjá monnum verða leiktar í ítróttarhøllini í Kollafirði.
SÍ – Fleyr, leygardagin kl. 15
Tað skerst ikki burtur, at nýklakti føroyameistarin SÍ er favorittur at vinna sær sæti í steypafinaluni. Tí iðra teir í Fleyr seg um, at teir í seinasta dystinum í bólkaspælinum týsdagin ímóti júst SÍ ikki megnaðu at gera sær dælt av einum av teimum trimum settbóltunum, teir høvdu í øðrum setti, sum so SÍ ístaðin vann 29-27. Vann Fleyr settið, so var mótstøðuliðið í hálvfinaluni í morgin ístaðin fyri ÍF, sum gjørdist nr. 3 í landskappingini.
Fleyr er í nakað somu støðu sum í fjør, tá liðið eftir eina miseydnaða landskapping tók tey flestu á bóli í hálvfinaluni í steypakappingini við 3-0 sigri á SÍ, sum tóktist vera fyri ongum eftir stóra vónbrotið í FM-finalunum stutt frammanundan, har føroyameistaraheitið glapp teimum av hondum eftir 3-2 tap fyri Mjølni í triðju og avgerandi FM-finaluni. Og í sjálvari steypafinaluni mundi Mjølnir fingið somu lagnu, tá Fleyr javnaði til 2-2 í settum, áðrenn Mjølnir vann javnbrótaran og tryggjaði sær steypið.
Tekin hava í seinastuni verið um, at Fleyr hevur tikið seg fram í bólkaspælinum í steypakappingini, har bæði Mjølnir og SÍ hava fingið dygga mótstøðu, men skal Fleyr endurtaka bragdið frá í fjør, krevst eitt veruligt ódnartak, tí SÍ hevur ikki tapt ein flogbóltsdyst síðan 1. oktober, tá Mjølnir vann 3-1 í landskappingini. T.v.s., at SÍ hevur vunnið 20 dystir á rað.
ÍF – Mjølnir, leygardagin kl. 19
Hjá sigursvanda Mjølni – verandi steypavinnara – hevur ikki gingist meira enn næstbest í bólkaspælinum, og tað var um reppið, at teirra mótstøðulið í hálvfinaluni heldur gjørdist SÍ, tí hevði Fleyr havt gagnnýtt bara ein av sínum trimum settbóltum í seinasta dystinum ímóti SÍ, so datt Mjølnir niður á fjórðaplássið, og hevði so skulað møtt SÍ ístaðin fyri ÍF. Við allari virðing fyri ÍF, so fegnast klaksvíkingar um tað.
Hinvegin vann ÍF 3-0 á júst Mjølni í bólkaspælinum, so hví skal tað ikki kunna endurtakast í einari hálvfinalu? Við til søguna hoyrir, at Mjølnir hevur ikki spælt við sterkastu manning í nógvum av dystunum í bólkaspælinum, og tað hevur sett sín dám á avrikini. Hevur Mjølnir sterkastu manning, eru klaksvíkingar framvegis favorittur at vinna og at koma í sína áttandu steypafinalu á rað, har fimm eru vunnar og tvær taptar av teimum seinastu sjey.
...
Fulla skráin fyri hálvfinalurnar í Bónuskappingini í Kollafirði leygardagin 18. apríl:
Kl. 13: TB - Fleyr (Kvinnur)
Kl. 15: SÍ – Fleyr (Menn)
Kl. 17: Mjølnir – SÍ (Kvinnur)
Kl. 19: ÍF – Mjølnir (Menn)
Flogbóltssamband Føroya sigur, at kostnaðurin er 100 krónur fyri allan dagin, men fyri 16 ára gomul og yngri er ókeypis atgongd.
Dystirnir verða eisini stroymdir á tv.fo
