Hesum boðar Tjóðveldi frá í kvøld.
– Hetta er ikki fyrstu ferð, tí Annika hevur verið virkandi tingbólkaforkvinna, tá Hervør hevur verið politisk ørindi uttanlands, skrivar Tjóðveldi, sum eisini skrivar, at tingbólkurin er samdur um, at Annika Olsen eisini røkir uppgávuna hesa ferð.
Einki verður sagt um, hvussu leingi Hervør Pálsdóttir verður í farloyvi, men hon hevur rætt at vera burtur í eitt ár. Og nógv kann broytast í politikki, tí um eitt ár eru tingfólk uttan iva farin í valstríð. Løgtingsval skal vera í seinasta lagi 8. desember næsta ár. Men desember er ikki ein góður mánaður til løgtingsval, tí tað passar illa beint undan jólum, og órógvar illa løgtingsfíggjarlógararbeiðið. Um einki óvætnað hendir, og nýval verður skrivað út fyri tíð, so verður løgtingsvalið næsta ár uttan iva hildið á heysti, kanska í september. Tað munnu fólk í øllum flokkum vera samd um vera eitt passandi tíðspunkt.
Men í politikki kann alt henda. Tað kann eisini vera okkurt tingmál, sum er átroðkandi hjá samgonguni at fáa í gjøgnum næsta heyst, og tí kann ein ætlan um at fyrireika eitt val í góðari tíð miseydnast. Men í øllum førum, so hevur Erling Eidesgaard aftur sæti á tingi, og tað hevur hann, til Hervør Pálsdóttir kemur aftur í tingið.
