Fiskifloti
Tilsamans 80 føroysk fiskiskip eru við í greiningini, sum grannskoðarafelagið Rasmussen & Weihe hava gjørt yvir fiskiskipaflotan fyri árið 2006.
Hetta er minsta tal av skipum, sum eru við við í greiningini, síðan felagið fór undir hetta arbeiði í 2002.
Í 2002 var samlaða talið av skipum, sum vóru við í greiningini 88, og árið eftir vóru tey 91. Í ár 2004 og 2005 vóru skipini ávikavist 86 og 85 – og síðan 80 í ár 2006.
Grannskoðarafelagið sigur, at ymiskar orsøkir eru til, at nøkur skip, sum annars eru partur av føroyska fiskiskipaflotanum, ikki eru við í greiningini.
- Okkurt skip hevur ikki latið inn roknskap fyri 2006, og í onkrum føri eru skip løgd. Í uppaftur øðrum føri er talan um onnur feløg, eitt nú kommanditfeløg, sum ikki hava almennan roknskap, sigur grannskoðarafelagið.
Í 2006 var talið av skipum hetta: Línuskip (24), partrolarar (22), lemmatrolarar (11), pelagisk skip (8), garnaskip (5), verksmiðjutrolarar (4), rækjuskip (3) og onnur skip (3).
