Verkfallið er skaðiligt fyri samfelagið, men vit hava ongar ætlanir um at leggja okkum út í tað.
Hetta vóru greiðu boðini frá løgmanni, tá Sosialurin vildi hava hann at vátta ella avsanna lívligu leysatíðindini um, at politiski myndugleikin longu í dag, týsdagin, fór at blanda seg upp í trætuna millum Føroya Arbeiðarafelag og Føroya Arbeiðsgevarafelag.
? Eg veit ikki, hvør tað er, ið hevur so lívligt hugflog, at hann veit hesi tíðindi. Sjálvur havi eg einki hoyrt um hetta, fyrr enn nú, tit ringja, segði løgmaður í telefonini týsmorgunin.
Tað er annars Bjarni Djurholm, ið er landsstýrismaður í arbeiðsmarknaðarmálum, og tískil hevur politisku ábyrgdina av trætuni. Men heldur ikki hann ætlar, at verkfallið skal steðgast í tinginum beinan vegin.
Einki uppskot er komið til Løgtingsskrivstovuna ella formansskapin í løgtinginum um at kalla løgtingið saman at steðga verkfallinum.
Tíksil eru tíðindini um politiksa uppíblandan í verkfallið hjá Føroya Arbeiðarafelag einki annað enn leysatíðindi ? í hvussu er fyribils.
