Kendi 49 ára gamli enski sangarin, Robbie William er sum so nógvir aðrir onglendingar ein stórur fótbóltsfjeppari.
Robbie Williams er vaksin upp í býnum Stoke við ánna Trent, og hann hevur frá barnaárum verið ein stórur fjeppari hjá fótbóltsliðnum, Port Vale sum spælir í triðbestu ensku fótbóltsdeildini.
Hitt liðið úr Stoke, ið tey flestu kenna, og sum hevur spælt nógv ár í Premier League er Stoke City.
Seinastu vikurnar hava leysasøgur gingið, at Robbie Williams sum javnan sæst til heimadystir hjá Port Vale ætlaði at keypa Port Vale. Men nú hevur leiðslan í Port Vale boðað frá í einum tíðindaskrivi, at tað er ikki upp á tal, at kendi sangarin skal yvirtaka fótbóltsfelagið.
Robbie Williams er tó heiðurslimur í Port Vale, og tann eina áskoðaraseksjónin á Vale Park leikvøllinum er uppkallað eftir honum.
