Sjey fjallaklintrarar lótu lív, tá eitt skalvalop rakti eina av legunum á fjallinum, Mount Yalung Ri í Nepal, gjáramorgnin.
Tað vita fleiri útlendskir miðlar at siga, eitt nú The Guardian og NBC News.
Sagt verður, at tveir ferðaleiðarar úr Nepal eisini eru millum tey deyðu. Hendingin fór fram í 4.900 metra hædd.
– Tríggir av fjallaklintrarunum vóru amerikanskir ríkisborgarar, ein var úr Kanada, og ein var úr Italia, sigur løgreglan í Nepal við NBC News.
Lagt verður aftrat, at fýra fólk framvegis eru saknað, og fýra onnur fingu løstir í vanlukkuni.
Í bólkinum vóru fimm fjallaklintrarar saman við ferðaleiðarum úr Nepal, sum skuldu klintra upp á 5.600 metrar høga fjallið.
Mount Yalung Ri verður mett sum eitt byrjanarfjall fyri tey, sum ikki hava so drúgvar royndir við fjallaklintring.
Illveður hevur tarnað bjargingararbeiðnum.
- Ein bjargingartyrla mátti venda aftur, tí her var kavastormur, og bjargingarfólk noyðast nú at leggja leiðina til gongu.
Útlendskir miðlar vita at siga, at bjargingararbeiðið heldur fram í morgun, men vónirnar um at finna nakran av teimum saknaðu á lívi minka so hvørt, sum tímarnir ganga.
