Viðskiftafólk hjá Danske Spil peika á Sisse Marie Welling (SF) sum nýggjan borgarstjóra í Keypmannahavn.
50 prosent av teimum, sum hava satsað uppá úrslitið í høvuðsstaðnum á kommunuvalinum týsdagin, hava sostatt satsað sínar pengar uppá hana.
Tað vísir ein fráboðan frá Danske Spil seinnapartin mánadagin.
- Tað merkir, at hon hevur fleiri innskot enn teir báðir nærmastu kappingarneytarnir tilsamans, sigur Peter Emmike Rasmussen, oddsmaður hjá Danske Spil.
Ein fjórðingur trýr uppá Pernille Rosenkrantz-Theil (S), meðan 22 prosent hava satsað uppá, at Line Barfod hjá Eindarlistanum endar sum borgarstjóri.
Bert trý prosent av tipparunum hava lagt síni innskot á konservativa borgarstjóravalevnið, Jakob Næsager.
Danske Spil vil ikki upplýsa, hvussu nógvir kundar hava spælt tilsamans.
Um Sisse Marie Welling endar sum borgarstjóri, merkir tað, at Javnaarflokkurin fyri fyrstu ferð í meira enn 100 ár missir valdið í høvuðsstaðnum.
Viðskiftafólkini hjá Danske Spil hava eisini havt áhuga í at spáa um úrslitið í hinum størstu donsku kommununum.
Her vænta nógv tey flestu tvørturímóti, at sitandi borgarstjórar verða verandi við valdið.
85 prosent halda, at Michael Vinfeldt (Javnaarflokkurin) heldur fram sum borgarstjóri í Frederiksberg, meðan 80 prosent peika á Peter Rahbæk Juel (Javnaðarflokkurin) í Odense og 75 prosent á Anders Winnerskjold (Javnaðarflokkurin) í Aarhus.
- Harumframt eru tað nú rættiliga nógvar kommunur, har kundar okkara spáa um broyting í borgarstjórastarvinum, vísir Peter Emmike Rasmussen á.
Tey flestu trúgva millum annað uppá valdsskifti í Ringkøbing-Skjern Kommunu og í Frederikshavnar Kommunu. Her sita Vinstri og Javnaðarflokkurin í løtuni við valdinum.
Í Frederikssunds Kommunu, Randers Kommunu og Albertslunds Kommunu peika eisini viðskiftafólk hjá Danske Spil á nýggjan borgarstjóra.
- Tað sær út til, at nýggir vindar blása nógvastaðni í kommununum, og at eftir fýra árum eru tekin um, at tørvur er á broyting í ovasta postinum, sigur Peter Emmike Rasmussen.
- Tað kemur fyri, sjálvt um tað ikki eru avgjørdir trupulleikar við sitandi borgarstjóra, at borgarar hava hug at royna okkurt øðrvísi.
/Ritzau/
