Tvey føroyingalið í bestu donsku hondbóltsdeildini hjá kvinnum leiktu fyrsta dystin hetta kappingarárið í kvøld.
Á heimavølli taptu Súna K. Hansen (myndin) og liðfelagarnir í Skanderborg 24-26 fyri EH Aalborg. Í steðginum var Skanderborg á odda 12-11.
Súna skoraði trý mál, legði upp til trý mál, og vann liðnum hjá sær eitt brotskast.
Maria P. Nólsoy og liðfelagarnir í Horsens taptu á útivølli 26-30 fyri Bjerringbro. Í steðginum var støðan javnleikur 14-14.
Maria skoraði tvey mál, legði upp til eitt mál, og vann liðnum hjá sær eitt brotskast.
Sunnudagin klokkan 15 verður føroyingauppgerð á skránni í Ringkøbing. Tá taka Rakul Wardum og liðfelagarnir í Ringkøbing móti Janu Mittún og hennara liðfeløgum í Viborg. Somu klokkutíð spæla Marita Mortensen og hennara liðfelagar í HØJ dyst á útivølli móti Keypmannahavn.
