Eiði
Anna Maria Poulsen er einasta kvinna í bygdaráðnum í Eiðis kommunu. Á valinum herfyri varð hon vald í bygdaráðið á triðja sinni, og er hon samstundis triðja kvinnan, sum hevur sitið í bygdaráðnum. Undan henni hava sitið Hildigarð Høghamar og Annvør Jacobsen.
Anna Maria er dagrøktarleiðari í Eiðis kommunu. Tað hevur hon verið í meira enn hálvt fimta ár. Í skipanini er einki loft, og í dag verða eini 60 børn ansaði í dagrøktini.
Nýggjur barnagarður
Í kommununi er eingin barnagarður, men bygdaráðið, sum nú leggur frá sær, hevur samtykt, at barnagarður skal byggjast á Eiði. Í verandi fíggjarári er ein miljón sett av til hetta arbeiði, og á komandi fíggjarætlan er 2,5 miljónir settar av.
Anna Maria sigur, at barnagarðurin er eitt av hennara hjartamálum í bygdaráðnum, og hon vónar, at tað ikki fer at taka alt ov langa tíð, til spakin verður settur í, og barnagarðurin stendur liðugur.
- Ætlanin hjá bygdaráðnum er at bygja sum skjótast, sigur hon.
Barnagarðurin á Eiði skal byggjast á leiðini, har eldrasambýlið er.
- Neyðugt er í fyrsta lagi at gera ein lítlan vegastubba, so økið verður atkomiligt, sigur hon.
Anna Maria býr í Ljósá, og hon fegnast um, at bygdin fekk reint kelduvatn í skjótt farna valskeiði.
- Men her er eisini ymiskt at taka hond um hjá nývalda bygdaráðnum. Eitt nú verður neyðugt at bøta um vegirnir, og somuleiðis eiga vit at frýðka eitt sindur um í bygdini, sigur hon.
Ikki nevndarsess
Tá ið nýggja bygdaráðið í Eiðis kommunu, sum tekur við 1. januar 2005, formelt skipaði seg á fundi mánakvøldið - við borgarstjóra, varaborgarstjóra og nevndarumboðum, var Anna Maria ikki við í nakrari av føstu nevndunum hjá kommununi.
Hetta fall í eyguni, og tí ringdi Sosialurin til hennara at fregnast, hvussu hetta hekk saman.
- Hetta hevur einki við ósemju at gera, sigur Anna Maria.
Hon vísir á, at hon sjálv ynskti ikki at vera við í nakrari av føstu nevndunum í kommununi, tí hon frammanundan hevur fleiri álitispostar at røkja sum umboð fyri Eiðis kommunu.
- Eg eri umboð í Korndalsbýlinum, sum er eldrasambýlið á Eiði, Eysturoyar Røktar-og Ellisheimi, Ráðnum fyri Ferðslutrygd og í stýrinum fyri Felagsskúlan á Oyrarbakka.
Hetta heldur Anna Maria Poulsen vera nóg mikið, og tí ynskti hon ikki at vera við í føstu nevndunum hjá Eiðis kommunu, men annars luttaka í tí arbeiði, sum fer fram í bygdaráðnum.
Kvinnur og kvinnur
Tað vóru tilsamans fimm listar, sum bjóðaðu seg fram til bygdaráðsvalið í Eiðis kommunu. Millum hesar var eisini ein kvinnulisti, sum ikki fekk serliga stóra undirtøku.
Kvinnur vóru eisini á øðrum listum, og Anna Maria Poulsen varð vald á listanum hjá Tordi J. Niclasen og Rólanti Poulsen.
