USS Abraham Lincoln hevur verið í tænastu í meira enn 250 dagar, og seinastu vikurnar hava fráboðanir verið um matvørutrot, trupulleikar við vatni og kloakk og álvarsligar sálarligar trupulleikar hjá manningini.
USS George Washington og fylgiskip tess eru nú komin til Miðeysturs. Amerikanska herleiðslan boðaði hósdagin frá, at hangarskipið er komið til økið sum liður í einari ætlaðari útskifting.
George Washington skal loysa USS Abraham Lincoln av, sum hevur verið úti í meira enn 250 dagar og hevur verið ein týðandi partur av amerikonsku hernaðaraðgerðunum móti Iran.
Tænastutíðin hjá manningini á Abraham Lincoln hevur verið óvanliga long. Skipið fór úr San Diego í november í fjør, og manningin hevur í meira enn 200 dagar ikki havt møguleika at fara í havn til vanligan frítíðarvirksemi.
Seinastu vikurnar eru samstundis komnar álvarsligar fráboðanir um umstøðurnar umborð. Familjulimir og amerikanskir miðlar hava greitt frá troti á mati og øðrum neyðsynjarvørum, trupulleikum við drekkivatni og kloakkskipanini og stórum sálarligum trýsti á manningina. Fráboðanir hava eisini verið um sjófólk, sum hava roynt at leypa fyri borð.
Umleið 5.000 sjófólk og hermenn eru knýtt at Abraham Lincoln. Langtíðartænastan hevur fingið amerikanskar politikarar at krevja svar frá Pentagon um viðurskiftini hjá manningini.
Donald Trump forseti hevur hinvegin víst aftur atfinningunum um longu tænastutíðina. Hann segði í síðstu viku, at hon als ikki hevði verið ov long, meðan amerikanska verjumálaráðið eisini hevur vart viðurskiftini umborð.
USS George Washington er vanliga staðsettur í Japan. Við flytingini til Miðeysturs hevur USA fyribils tikið eitt av sínum týdningarmestu hangarskipum úr Asia-Kyrrahavs-økinum.
##med2##
##med3##
##med4##
##med5##
##med6##
##med7##
