Flokkurin hjá andstøðuleiðaranum, Péter Magyar, Tisza, hevur vunnið tveir triðingar av meirilutanum í tjóðartinginum í Ungarn eftir valið í gjár.
Tað upplýsir tíðindastovan AFP, eftir at meira enn 98 prosent av atkvøðunum eru taldar.
Tveir triðingar meirilutin merkir, at Tisza hevur valdið at broyta landsins grundlóg.
133 sessir skulu til fyri at fáa slíkan meiriluta, og sambært AFP sær Tisza út til at fáa 138 sessir. 199 sessir eru á tingi.
Fyrr um kvøldið lýsti Magyar seg sum vinnara framman fyri túsundtals fólkum í ungarska høvuðsstaðnum, Budapest.
Forsøgnir høvdu eisini spátt, at Magyar fór at vinna stórsigur.
Hetta feldi russisktsinnaða forsætisráðharran, Viktor Orbán, sum hevur sitið í 16 ár. Flokkurin hjá honum, Fidesz, sær út til at fáa 55 sessir á tingi, og tað er eitt risa afturstig fyri flokkin.
Tá Péter Magyar sunnukvøldið hitti almenningin í Budapest, segði hann, at hann fer at stýra Ungarn aftur móti ES eftir fleiri ár við spenningum millum Orbán-stjórnina og aðrar evropeiskar leiðarar.
– Ungarn verður enn einaferð ein sera sterkur sameindur hjá ES og NATO, varð sagt, sambært miðlinum CNN úr Magyar.
Millum annað hevur Orbán forðað fyri einum láni upp á 90 milliardir evrur til Ukraina.
Orbán er ES-skeptikari og hevði sniðgivið eina fyrimynd fyri einum sokallaðum ófrælsum fólkaræði. Fyrimyndin varð sædd sum ein fyrimynd til rørsluna "Make America Great Again", sum amerikanski forsetin, Donald Trump, hevði skapt.
Men sambært tíðindastovuni Reuters eru nógvir ungarar vorðnir troyttir av honum eftir trý ár við búskaparligum afturgongdum og hækkandi livikostnaði.
Orbán viðgekk ósigurin sunnukvøldið og segði seg hava ynskt Magyar tillukku við sigrinum.
– Hóast valúrslitið ikki er endaligt enn, so eru tey greið og skiljandi. Fyri okkum eru tey pínufull, men púra greið, segði Orbán við tíðindafólk, sambært AFP.
/Ritzau/
