Rás 2 fær ikki mánaðarstyrk á eina krónu fyri hvønn borgara, sum uppskotið til avtalu við býráðið í Havn leggir upp til. Hetta kom fram á fundinum mánakvøldið, tá umboð fyri Rás 2 vóru inni á teppinum hjá Mentamálanevndini og Fíggjarnevndini og greiddu frá útkastinum.
Samtykt varð á fundinum at beina málið aftur í Mentamálanevndina. Hendan skal so gera nakrar karmar, hvussu eitt møguligt samstarv kann síggja út. Tórshavnar býráð skal so á fundi 7. september taka støðu til, um hetta skal gerast fuglur ella fiskur.
Á jøvnum føti
Formaðurin í Mentamálanevndini Kaj Leo Johannesen hevur somu støðu í dag, eftir at hann hevur hoyrt grundgevingina fyri eini avtalu frá Rás 2 umboðunum.
Vit kunnu ikki fara inn og stuðla einum ávísum fjølmiðli, tí í mínari verð mugu øll hava somu treytir. Eg ivist heldur onga løtuna, at aðrir fjølmiðlar høvdu komið á býráðsfund, um hesir fingu 200 túsund krónur um árið, sigur Kaj Leo.
Formaðurin í Mentamálanevndini heldur bestu loysnina verða, at kommunan keypir tær tænastur, ið man metir brúk er fyri.
Vilja vit kunna borgaran um eitthvørt, so keypa vit ein tíma í onkrum loftmiðli og gjalda fyri hesa tænastu. Lætt og einfalt, sigur Kaj Leo Johannesen, sum eins og allir hinir býráðslimirnir heldur tað verða skilagott við meiri kunning út til borgaran í kommununi.
Geva tí ein kjans
Leivur Hansen, formaður í fíggjarnevndini, heldur tað ikki er rætt, at óttast eitt samstarv millum Rás 2 og býráðið. Hann hevur kunnað seg um slík viðurskifti í grannalondunum.
Hetta er vanligt í londunum kring okkum, og samstarvið millum kommunu og loftmiðil riggar óføra væl, sigur Leivur Hansen, ið sjálvir er útbúgvin journalistur.
Sjálvandi skal ikki vera talan um sokallaðan "skøkjujournalistikk", har politikarar sleppa at gera sær dælt framman fyri opnari mikrofon. Hetta skal fyrst og fremst vera ein kunningartænasta til allar borgararnar í kommununi, sigur Leivur Hansen.
