Føroyska kvinnulandsliðið í hondbólti skal í dag klokkan 15 spæla EM-undankappingardyst móti heimsstjørnunum úr Svøriki. Liðið kom í gjár til Svøriki og hevur í morgun havt seinastu venjingina undan dystinum.
- Lagið í hópinum er gott. Spælararnir er spentir at sleppa at spæla móti Svøríki. Talan er jú um stjørnur í hondbóltsheiminum, sigur Sophus Dal-Christiansen.
Ein broyting er í hópinum í mun til dystin móti Serbia, sum endaði við 33-17 ósigri. Siw Matras er við aftur, meðan Bára K. Hansen er eftir í Føroyum. Annars er talan um sama hóp. Kristianna H. Joensen og Liljan Djurhuus eru framvegis ikki við. Bæði Súna K. Hansen og Maria H. Weyhe, sum fingu debut á landsliðnum móti Serbia, eru eisini við á ferðini til Svøríki.
Fyrri dysturin millum liðini endaði við 33-15 sigri til Svøríki. Tann dysturin bleiv spældur í Føroyum 1. oktober í fjør. Tá kláraðu føroysku spælararnir, at fylgja við Svøríki fyrstu minuttirnar. Eitt skifti var støðan 5-5.
- Vónandi fáa vit betra um okkara egna avrik, men vit mugu ásanna at Svøríki er mundandi sterkari enn Serbia, so hetta fer at gerast torført, sigur Turið Arge Samuelsen.
Dysturin millum Svøríki og Føroyar verður í dag klokkan 15. Til ber at stroyma dystin á www.ehftv.com.
Málverjar:
Viviann Petersen, VÍF
Ragnhild av Heygum, VÍF
Útispælarar:
Turið Arge Samuelsen, Kyndil
Tóra Eliasen, Stjørnan
Marjun Falkvard Danberg, Neistin
Marianna Geirsdóttir Eystberg, Kyndil
Agnas Olsen, VÍF
Maria Halsdóttir Weyhe, H71
Durita Christophersen Jojic, VÍF
Daniella Joensen, Neistin
Heidi Maria Akselsen, VÍF
Súna Krossteig Hansen, Kyndil
Bjarta Johansen, Kyndil
Pernille Brandenborg, Vendsyssel
Siw Matras Larsen, TMS Ringsted
