Amerikanski herurin sigur, at USA framdi fleiri álop á Iran í gjárkvøldið og í nátt, og Iran lovar hevnd fyri álopini.
Sagt verður, at álopini eru svar upp á tað, sum USA rópar iransk álop á vinnulig skip í Hormussundinum.
- Iran hevur víst eina ógrundaða og vandamikla "aggressión", sum er brot á vápnahvíldaravtaluna, sigur miðeystur kommando'in hjá USA, nevnd Centcom.
Álopini á Iran týskvøldið og í nátt eru prísurin fyri iransku álopini á vinnuliga skipaferðslu.
Centcom sigur, at málini við amerikansku álopunum vóru iranskar loftverjuskipanir, eftirlitsskipanir og rampar til útskjóting av dronum og rakettum.
USA heldur, at iransku álopini á skip í Hormussundinum eru týðilig brot á vápnahvíldina, men Iran leggur eisini USA undir at bróta avtaluna, sum londini gjørdu í juni.
Amerikanski herurin sigur, at 80 mál í Iran vórðu álopin í nátt, og klokkan 04 lokala tíð í morgun vóru álopini av.
Í iranska uttanríkisráðnum verður sagt, at Iran fer at gera tað, sum neyðugt er fyri at verja landsins áhugamál og trygd.
Iranska kollveltingarhirðin sigur sambært Reuters, at Iran hevur lopið á tilsamans 85 amerikansk hernaðarmál í Bahrain og Kuwait.
Sambært iranskum miðlum vóru spreingingar at hoyra nærindis oynni, Qeshm og havnarbýunum, Sirik og Bandar Abbas, har suðuri í landinum.
- Í Sirik raktu seks rakettir eitt havnalag og spreingingar vóru eisini á Khargoynni, haðani 90 prosent av iransku oljuni kemur.
USA hevur fleiri ferðir lopið á Khargoynna, og amerikanski forsetin, Donald Trump, hevur áður sagt, at USA hevur eitt ynski um at taka oynna.
Aftur í gjár setti USA revsitiltøk í verk móti iranskari olju, og alt hetta hendir í Miðeystri, samstundis sum Donald Trump luttekur á Nato-toppfundi í Turkalandi.
Nato-aðalskrivarin, Mark Rutte, sigur við útlendskar miðlar í dag, at amerikansku álopini á Iran avgjørt eru neyðug.
##med2##
