Á Sandi harmast tey um, at eingin Eplafestivalur kundi haldast í heyst, men hetta hevur einki við tað at gera, at grøði trýtur.
Tvørturímóti.
Korona hevur argað. Fyrst varð Eplafestivalurin útsettur, men nú er so endaliga avgjørt, at eingin festivalur verður í heyst.
Latið verður væl at grøðini í heyst, og Sandarfløttur er á tremur við kanska besta og burðardyggasta grønmeti ið finst.
Í góðveðrinum sunnudagin vitjaðu hotelkokkar og starvsfólk av Hotel Brandan bæði á Miðstovugarðinum og Uttastovugarðinum í Trøðum.
Sagt verður, at gestirnir vóru sera væl nødir við framleiðsluna, tey sóu, og semja varð gjørd við báðar garðarnar um samstarv.
Nú jólamatskráirnar í høvuðsstaðnum verða skrúvaðar saman, kemur grønmeti av Sandi at hava ein týðandi leiklut.
- Tað er hugaligt við slíkum samstarvi, og partarnir fegnast um, at grøði av Sandi kann gerast ein enn størri partur av matskránni á hotellunum í Havn.
Á Sandi eru tey helst fremst í Føroyum at velta, og her kemur nógv góð grøði burturúr.
