Forsetarnir í Ukraina og Fraklandi, Volodymyr Zelenskyj og Emmanuel Macron, snakkaðu mánakvøldið í telefon um støðuna á kjarnorkuverkinum, Zaporizjzja.

Kjarnorkuverkið, sum er hitt størsta í Evropa, liggur umleið 50 kilometrar í ein útsynning úr býnum, Zaporizjzja.

Russar tóku verkið tíðliga í krígnum, men tað eru ukrainar, sum arbeiða á verkinum. Býurin Zaporizjzja, sum verkið eitur eftir, er undir ukrainskum ræði.

Soleiðis liggur kjarnorkuverkið á hermótinum millum stríðandi partarnar við ánni, Dnipro ímillum. Júst her er stóra áin nakrar kilometrar breið.

Fyri kríggið stóð Zaporizjzja fyri umleið einum fimtingi av allari el-framleiðsluni í Ukraina, men í løtuni eru allir reaktorar á verkinum sløktir, tí trygdin er í vanda.

The Kyiv Independent visti mánakvøldið at siga, at Volodymyr Zelenskyj og Emmanuel Macron eitt nú skiftu orð um støðuna á verkinum.

Um vikuskiftið brustu bumbur nærindis verkinum, og stríðandi partarnir geva hvørjum øðrum skyldina fyri álopini, har ukrainar siga, at russar brúka verkið sum skjøldur í krígnum.

Serfrøðingar hjá altjóða kjarnorkustovninum (IAEA) søgdu mánakvøldið eftir eina vitjan á verkinum, at kjarnorkuverkið er heilt, og at støðan er stabil, sum teir tóku til.

Nakrar av spreingingunum um vikuskiftið vóru rættiliga nær verkinum og stjórin í IAEA, Rafael Grossi, seg, at bumburnar raktu ikki kilometrar burtur, men at talan bert var um metrar.