Aftaná 20 ár: Nú kann eg ikki gevast

Sólin stendur ikki hægst á himmlnum longur. Klokkan er farin um sjey, men fram­vegis kennist hitin drúgvur. Luftin er slavin og stemn­ing­urin er spentur á Front Street í Hamilton býarpartinum í Bermuda.
Á startmálinum standa einir 40 súkklarar klárir til at býarkoyringina. Hon er sein­asta súkklingin á Oyggja­leik­unum á Bermuda. Føroyska súkkluliðið hevur fýra mans við. Fremst stendur 23 ára gamli Torkil Veyhe, sum er okkara sterkasti súkklari, men hann er enn ikki so roynd­ur í býarkoyring.
Aftanfyri hann eru Bogi Kristiansen og Gunnar Dahl-Olsen, sum báðir eru legendir í føroyskari súkkling. Aftanfyri teir stend­ur lærlingurin, Jóanis Albert Nielsen, sum er við fyri fyrstu ferð.
»Ready«, rópar frásøgu­mað­urin á málinum og so letur hann eitt skot av. Í einum seta 40 súkklarar ferð á og royna at koma so skjótt avstað, ið til ber. Mitt í roka­num fara tveir mans um koll. Tá allir hinir eru komnir av­stað er greitt, at ein annar súkklari hevur rent á Boga Kristiansen, sum fer um koll.
Feltið er komin fleiri hundr­að metrar áðrenn Bogi Kristiansen kemur upp á súkkl­una og byrjar at fáa ferð á.
Teinurin er stuttur og tað tekur undir tveir minuttir at koma runt teinin, sum hevur fleiri sving í bæði mótbrekku og undanbrekku. Bogi roynir í nakrar umgangir at koma fram til høvðusfeltið, men býarkoyringin er náðileys. Ongin er at hjálpa Boga, sum er púra einsamallur og av­settur. Hóast hann er djarvur súkklari og dámar væl tøttu teinarnar í býarkoyringini, so megnar hann ikki at inn­heinta hinar.
Oyggjaleikirnir hjá Boga Kristiansen enda stutt seinni, tá royndi súkklarin legg­ur kongin og bremsar fyri seinastu ferð.

»Eg gevist ikki soleiðis«
Á málinum er lagið gott. Torkil Veyhe kemur á mál sum nummar 7, meðan Gunn­ar Dahl-Olsen kemur á mál við høvðusfeltinum. Eftir fleiri strævnar súkklingar eru oyggja­leikirnir komnir at enda fyri føroysku súkklar­nar.
Bogi er prátingarsamur á málinum, meðan súkklingini verður viðgjørd og menn meta um síni egnu avrik og av­rikini hjá hinum.
Tá prátið fellur inn á fram­tíðina hjá 48 ára gamla súkklaranum verður tónin tó álvar­sligur.
– Eg gevist ikki nú. Ikki upp á hendan mátan sigur Bogi avgjørdur.
– Eg stóð fastur á málinum og tá eg skuldi fara upp á súkkluna hjá mær aftur, mundi maðurin, sum eg rann saman við, fari við súkkluni hjá mær, greiðir Bogi frá.
– Nú kann eg ikki gevast. Eg verið við aftur um tvey ár, er staðfestingini frá Boga.

Frá báti til súkklu
Bogi Kristiansen rør sum ung­ur, men velur í 1992 at gevast. Hann leitar eftir nýggj­ari avbjóðing og nú vil hann sjálvur sleppa at velja nær hann venur. Hann vel­ur at seta seg á eina súkklu og byrjar at venja við súkklu­felagnum.
Tað gerst skjótt greitt, at hann er dugnaligur súkkl­ari. Orkan er góð og longu í apríl koma góð boð. Oyggja­leikirnir eru í Isle of Wight um summarið og súkklu­fel­ag­ið umhugsar at taka Boga við.
– Eg fekk at vita, at um eg legði nógv fyri, so slapp eg við. Eg keypti mær nýggja súkklu og útgerð og helt fram at venja, greiðir Bogi frá.
Nógva venjingin gevur úrslit og Bogi er við í ferða­lag­num til Isle of Wight. Í fyrstu kappingini kemur Bogi á mál sum nummar 10. Hann er ovurfegin um úrs­lit­ið, men er lítillátin um fram­tíðina eftir úrslitið. Við útvarpið sigur hann, at hann ivast um hann heldur fram við at súkkla, tí tað stendur ein langur, kaldur og myrkur vetur fyri framman.
– Nú standi eg her – tjúgu ár seinni, sigur Bogi við ein­um brosið.

»Eitt sekund frá sensatiónini«
Bogi heldur fram at súkkl­að og í 1995 eru aftur Oyggja­leikir á skránni. Hesa ferð á Gibraltar, sum liggur sunnan­fyri Spania. Einkult­starturin fyri lið er á skránni. Talan er um ein tein upp á fýra kilo­metrar við brættari mót­brekku.
Í Føroyum verður vant nógv, men vónirnar eru lítlar. Isle of Man, sum er súkkluoyggj burturav, er stór­favorittur og hevur síðani ment súkklarar sum Mark Cavendish, sum í dag vinnur etapu omaná etapu á Tour de France.
Jens Glerup er venjari og hann hevur lúrt brætta teinin av. Føroyska liðið, sum er mannað av Boga Kristiansen, Gunnari Dahl-Olsen, Rógva Johansen og Jóhan Brend, venur við at súkklað niðan til radarastøðirnar á Sonnfelli.
Vit vandu nógv og tak­tikkurin var, at Jóhan Brend drassaði okkum á langa tein­inum, so eg, Gunnar og Rógvi vóru væl fyri til fjalla­túrin, greiðir Bogi frá. Í lið­kappingini eru tað tríggir teir fremstu, ið telja við í samlaðu støðuni.
Nógva venjingin gevur úrslit og føroyska liðið gevur favorittunum úr Isle of Man skarpan ganga. Føroyska lið­ið er bara eitt sekund frá at vinna gull.
Vit vóru púra ókendir áðrenn og ongin væntaði nak­að av okkum, men tann kapp­ingin broytti alt, sigur Bogi.

Ein telvari á súkklu
Bogi flytur í 1998 niður við familjuni at arbeiða. Í byrjan­ini gongur væl og Bogi stríðir seg upp frá C bólkinum til A bólkin í danskari súkkl­ing. Alt upp á bara eitt kapp­ing­arár.
Millum annað familjulívið ger tó, at Bogi ikki hevur stund­ir at venja nokk til at halda fast í A-bólkinum. Hann endar í einum bólki fyri menn yvir 30 ár, sum eru á støðið við B-bólkin.
Tríggjar ferðir er Bogi blivin nummar trý í býar­koyr­ing, og fleiri ferðir í topp 5 í 100 km; tó uttan at fáa heiðurs­merki á tí teininum á Oyggja­leikunum. Eitt úrslit hann er væl nøgdur við.
Í øllum trimum førinum eru tað fulltíðarsúkklarar, sum enda frammanfyri meg. Tí kundi tað illa verið øðrvísi, so tí eru eg væl nøgdur við tey bronsuheiðursmerkini, sig­ur Bogi.
Styrkin hjá Boga liggur millum annað í taktiska vit­inum. Hann verður av mill­um annað Gunnari Dahl-Olsen lýstur sum ein telvari á eini súkklu. Hann brúkar sjáldan óneyðuga orku og veit akkurát nær hann skal sláa til. Hann er eisini ein maður við nógvum góðum ráð­um til sínar liðfelagar.

Fjallasúkkling
Bogi hevur á hesum leikunum eisini luttikið í fjallasúkkling. Um veturin er mangan kalt og frost á landavegunum í Danmark og tí verður súkkl­ingin hildin við líka við at súkkla í ymiskum skógum og plantasjum. Har er læ og frostið hevur ikki somu ávirkan.
Eg fann útav, at eg kláraði meg væl á fjallasúkkluni og valdi tí at gera eina roynd. Tað er stuttligt og avbjóðandi. Eg haldi, at tað hevur gingið fínt her eisini, sigur Bogi, sum sostatt luttók í fýra ymiskum súkklugreinum á Bermuda.

Klárur til Jersey
Boðskapurin er greiðir. Bogi Kristiansen takkar ikki fyri seg í súkkling, eftir eina mis­eydnaða býarsúkkling, tí onkur tilfeldigur súkklari ikki dugur sær hógv á start­mál­inum.
Bogi hevur í tjúgu ár liva lívið sum súkklari og tað held­ur fram. Kappingarandin, viljin til at trýsta seg sjálvan og fáa nýggjar avbjóðingar er til staðar.
Bogi hevur øll hesi árini lut­tikið á tíggju Oyggja­leik­um og hóast hann verður hálvthundrað til komandi leik­irnar, so hevur hann ikki í sinn­inum at gevast.
– Súkkling er ein lívsstílur. Eg súkkli til arbeiðis og súkkli heim. Gjarna ein umveg um veðrið er gott. Eg súkkli tí mær dámar tað, sigur Bogi um spurningin hvussu tað ber til at hann framvegis súkkl­ar eftir 20 ár í ítróttini.
Tað er ikki til at síggja, at maðurin er 48 ár og tað verður heldur ikki til at síggja, at hann er hálvt hundr­að, tá hann, um alt vil, aft­ur umboðar Føroyar í súkkl­ing á Oyggjaleikunum á Jersey um tvey ár.