Martin Kristoffur Kristiansen, ið skrivar fyri heimasíðuna hjá Eiðis kommunu, hevur skrivað eina klummu, nú Heystfagnaðurin 2025 er lagdur aftur um.
- Føroya bygdasligasta tiltak - Heystfagnaðurin - var aftur á skránni í ár, og tiltakið telist millum tey best umtóktu heysttiltøkini kring landið.
Í klummuni vísir Martin Kristoffur á, at Heystfagnaðurin leggur dent á bygdamentan í Føroyum og tað, ið heystið hevur at bjóða.
- Fagnaðurin telur alskyns tiltøk yvir fleiri dagar, men tað er einki ivamál um, at leygardagurin er tann stóri dagurin. Á høvuðsøkinum er sum á ólavssøku, tá stóra fjøldin savnast um tey fjøltáttaðu tiltøkini.
Og hann leggur aftrat:
- Á pallinum verður kappast í øllum - frá at vinda hespu til at finna Føroya størsta epli. Kappingin, ið dregur flestu áskoðarar, er óiva flettikappingin.
Her er ein stór mannamúgva savnað í góðveðrinum at síggja flettararnar kappast umframt at skoða hinar kappingarnar og annars at hugna sær saman.
- Sum heild var veðrið avbera gott og átti ivaleyst sín leiklut í, at ársins Heystfagnaður tók fleiri met í mun tal av gestum.
Martin Kristoffur Kristiansen vísir á, at stóra undirtøkan sæst eisini aftur í søluni av mati.
- Longu klokkan 16 leygardagin var meira suppa seld enn allan leygardagin í fjør og sum heild var allur matur mest sum útseldur.
Í endanum av klummuni leggur hann aftrat, at heystfagnaðurin 2025 er nú av, og Eiðis kommuna takkar øllum fyriskiparum og gestum fyri eitt væl frágingið tiltak.
