FC Barcelona er úti av ársins Champions League kapping. Tað hendir eftir at teir taptu 2-0 fyri Atletico Madrid í kvøld. Samanlagt vinnur Atletico Madrid fjórðingsfinaluna 3-2. Í hini fjórðingsfinaluni vann Bayern Munchen samanlagt á Benfica.
Hvar er Lionel Messi?
Undan dystinum var Barcelona á odda 2-1, og kundi tí liva við einum málleysum javnleiki. Atletico Madrid byrjaði við at trýsta eitt nærmast kreppukent Barcelona lið, sum ikki hevur vunnið í fýra dystum.
Úrslit kom burturúr trýstinum, tá Antoine Griezmann stóð einsamallur í brotsteiginum og stútaði hegnisligt innlegg í málið. Restina av dystinum trýsti Barcelona, meðan Atletico Madrid við Diego Simeone við róðrið vardi ímóti.
Tað endaði við, at Atletico Madrid fór í mótálop og vann sær brotsspark. Aftur var tað Antoine Griezmann, sum skoraði fyri Atletico Madrid. Barcelona fekk ein møguleika, at fáa dystin í longdaleiktíð, tá Barcelona av røttum átti brotsspark, men sendi eftirfylgjandi frísparki omanfyri málið.
Stóri spurningurin seinastu vikurnar er, hvar er Lionel Messi? Hann hevur ikki spælt væl síðani El Clasico, og aftur í kvøld var hann lítið eyðsýntur, Tað kann helst eisini sigast um eitt nú Neymar. Niðurstøðan eftir dystin kvøld er, at bæði Barcelona og Lionel Messi eru menniskjaligir.
Í hini fjórðingsfinaluni vann Bayern Munchen samanlagt á Benfica. Sostatt eru Real Madrid, Manchester City, Atletico Madrid og Bayern Munchen víðari til hálvfinaluna í Champions League.
Champions League:
Atletico Madrid (1) – (2) Barcelona 2-0
1-0 Antoine Griezmann, 36
2-0 Antoine Griezmann, 88 (br)
Benfica (0) – (1) Bayern Munchen 2-2
1-0 Raul Jimenez, 38
1–1 Arturo Vidal, 52
1-2 Thomas Mueller, 70
2-2 Anderson Talisca, 76
