Fyrsta útgáva av bókini um bátasmíð í Sandavági er nærum útseld . Tí er bókin “Føroyski báturin - Bátur og bátasmíð” endurprentað. Og bøkurnar eru komnar til Sandavágs. Vit eru ovfarin av undirtøkuni og gravganginum eftir bókini.
Fríggjadagin, frá klokkan 14:00, verður bátaprát við Terja R. Jakobsen, bátasmiðin í Steigartúni. Um gongdina at smíða 5-mannafarið, og hvat er eftir at gera.
Fríggjadagin vera eisini í Steigartúni, Heini og Jan Erik, rithøvundarnir á bókini “Føroyski báturin - Bátur og bátasmíð”. Bókin verður til keyps á staðnum, og møguleiki er at fáa bøkur signeraðar, ið ikki eru tað.
Heini og Jan Erik hava eisini skipað fyri teimum 14 vælumtóktu plakatunum, sum eru í Steigartúni.
Bókin fæst til keyps í hesum handlum:
Bartalsstova/Samkeyp í Sandavági.
Fiskastykkið/Úti á Gjógv í Sandavági.
Gamli Bókhandil (HNJ) í Havn.
Rit & Rák í SMS í Havn.
Bókabúðin í Saltangará.
Alfa bókhandil í Klaksvík.
Heimildarfilmur um bátasmíð
Rás Vágar vitjar javnan í Steigartúni til upptøkur. Tað verður spennandi at síggja í heyst, hvat hesir báðir úrmælingarnir, Jens Jákup Hansen og Jónfinn Stenberg, hava fingið í “kassan” til heimildarfilmin um bátasmíð. Livst so spyrst.
Báturin er til sølu
Báturin verður settur til sølu, tá hann er liðugt smíðaður. Støddin er 5. mannafar. Við fylgja 4 árar og róður. Báturin er somu stødd, sum Kiwanis-báturin, ið lutaður varð burtur á ólavsøku 2023. Áhugað kunnu ringja til Dagbjørn Hansen á fartlf. 787477 , upplýsir Sandavágs Fornminnafelag og Sandavágs Bygdarsavn í tíðindaskrivi.
