Tey eru bæði fødd Hansen tann 5. oktobur 1973 á Landssjúkrahúsinum. Síðani tann dagin hava vegir teirra fleiri ferðir tilvildarliga runnið saman.
Í dag eru tey svágd, tí Jákup Oluf er trúlovaður við systir Janu, og Jana er mostir at dóttir hansara.
Fyrstu ferð, tey hittust aftur, var tá bæði byrjaðu á Fiskivinnuskúlanum í senn. Síðani arbeiddu tey saman eitt skifti á kryvjivirkinum í Vestmanna.
Seinasta tilvildarliga hendingin var, tá tey stillaðu upp - bæði fyri fyrstu ferð - til kommunuvalið hesaferð. Tað eydnaðist báðum at verða vald, hon í Sunda kommunu, hann í Vestmanna. Og tá bygdaráðini vórðu skipað, vísti tað seg, at bæði vóru vald í trivnaðarnevndirnar.
Vit byrjaðu við bróstamjólkini. Tað var soleiðis, at Petrina, mamma Jákup Oluf, hevði nógva mjólk, men Helena, mamma Janu, hevði ikki ein dropa ? so, um móðurmjólk ger nakran mun, tá tað kemur til politikk, tað má tíðin koma at vísa.
