Katalanski loysingarleiðarin Carles Puigdemont er handtikin í Italia.
Tað upplýsir sakførari hansara sambært tíðindastovuni AFP seint í kvøld.
Puigdemont er skuldsettur fyri at hava ábyrgdina av eini ólógligari fólkaatkvøðu í 2017 um, at Katalonia loysir frá Spania.
Fleiri av hinum politikarunum, sum arbeiddu fyri katalanskari loysing, eru dømdir í fongsul upp til 13 ár.
Men Puigdemont, sum áður var forseti í landspartinum Katalonia, hevur higartil megnað at sleppa undan rættarsókn í Spania, tí hann hevur verið í útlegd, og tað hevur ikki eydnast Spania at fáa hann útflýggjaðan.
Hann hevur, í tíðini hann hevur verið í útlegd, eitt nú vitjað hjá Tjóðveldi í Føroyum, tá Magni Arge, táverandi fólkatingsmaður, beyð honum á vitjan. Hann umboðaði Katalonia á eini ráðstevnu hjá Tjóðveldi í Norðurlandahúsinum um tjóðskaparligan sjálvsavgerðarrætt.
Í 2017 sendi ein spanskur dómstólur út handtøkuboð upp á tann nú 58 ára gamla Carles Puigdemont, sum síðani valdi at fara í friðskjól í Belgia.
Í mai í 2019 varð hann valdur í Evropatingið. Í mars í ár atkvøddi ein meiriluti av limunum fyri at taka órinið frá honum.