Elias skoraði sjey mál í heimasigri hjá THW Kiel

Elias Ellefsen á Skipagøtu gjørdist næstbesti málskjúttin í stórsigri hjá THW Kiel

Aftaná trý tap á rað í týsku bundesliguni komu Elias Ellefsen á Skipagøtu og liðfelagarnir í THW Kiel loksins á sigurkós aftur.

Kiel vann í dag á heimavølli stórsigur 34-23 á Hamburg. Í steðginum var Kiel á odda 19-15.

Elias var sera eyðsýndur í dag. Hann gjørdist næstbesti málskjúttin hjá Kiel við sjey málum. Harumframt legði Elias upp til fýra mál.

Toppskjútti hjá Kiel var Niclas Ekberg við átta málum.

Kiel er nummar sjey í deildini við átta stigum fyri sjey dystir.

Komandi mikukvøld klokkan 19.45 hevur Kiel heimadyst móti pólska liðnum, Kielce í Champions League.