Sambært stóra bretska miðlinum, BBC er norska landsliðstroyggjan útseld kring alt Evropa.
BBC skrivar, at norska fótbóltssambandið, NFF hevur púrasta undirmett áhugan fyri norskum landsliðstroyggjum.
Tað var serliga aftaná 2-1 sigurin hjá Noregi á Brasil í HM-fjórðingsfinaluni, at norsku landsliðstroyggjurnar blivu nógv eftirspurdar.
Runar Pahr Andresen hjá norska fótbóltssambandinum greiðir frá, at í fjør bíløgdu tey 50.000 landsliðstroyggjur, og hesaferð høvdu tey bílagt 250.000 landsliðstroyggjur, og tað var kortini ikki nóg mikið til at nøkta ovurstóra eftirspurningin.
Stóri handilin, Torshov Sport í Oslo upplivdi eina bíðirøð upp á 600 metrar við fólki, ið vildu keypa eina norska landsliðstroyggju. Hetta var dagin eftir Noreg hevði vunnið 2-1 á Brasil.
Handilsleiðarin hjá Torshov Sport, Anders Lilleberg segði við VG, at hann ongantíð áður hevði upplivað nakað líknandi. Hann viðgekk í samrøðuni, at tey á Torshov Sport høvdu ikki lagt upp fyri einum so stórum eftirspurningi. Tey hildu seg hava nógvar norskar landsliðstroyggjur á laguri, men tað vísti seg ikki at halda stikk.
Hjá Nike, ið hevur framleitt norsku landsliðstroyggjuna hevur hon verið útseld í longri tíð. Talsmaður hjá Nike sigur við BBC, at tey harmast mangulin upp á norskar landsliðstroyggjur, og tey fara at arbeiða fyri at bøta um hetta skjótast til ber.
