Økt virksemi uttan ovurhiting er kynstrið

Ingolf S. Olsen

Ein byggiverkætlan fyri tvær milliardir krónur, sum skal fremjast innan lutfals­liga stutta tíð í einum lítlum bú­skapi sum tí føroyska, kann ikki annað enn hava stóra ávirkan, meðan hon er í ger.
Kynstrið er tí, at fáa sum mest burtur úr økta virk­seminum, uttan at partar av bú­skapinum – tær vinnur, sum í størstan mun sleppa upp í part at gera tunlarnar mill­um Suðurstreym og Skála­fjørð­in og millum Suður­streym og Sandoynna – verða ovurhitaðir.
Tað heldur Sverri Han­sen, formaður í Bú­skap­ar­ráð­num.
- Málið má verða at fáa so stóran eftirspurning eftir føroyskum veitarum sum gjørligt, so alt sam­felag­ið kann nýta gott av økta aktivitetinum. Men sam­stundis má ferðin á arbeið­num ikki verða so stór, at eftir­spurn­ingurin eftir summ­um veitingum, til døm­is lastbilum og last­bil­førar­­um, verður ov stórur. Tá er betri, at verkætlanin verður strekt í tíð, sigur Sverri Hansen.

Kend loysn
Hann hevur ikki sum so eina meining um, hvørt verk­ætlanin er búskaparliga skila­góð – enn í hvussu er.
- Eg kenni bara verk­ætlan­ina frá miðlunum, og havi ikki sett meg inn í smá­lut­ir­nar. Hetta er ein polit­isk loysn á einum máli, sum hevur ferðast aftur og fram í politisku skipanini og í almenna kjakinum í nógv ár eftirhondini. Nógv­ar útrokningar, sum eg havi sæð, hava víst, at Skála­fjarð­ar­tunnilin væl hevði latið seg gjørt at fíggja við ferðslu­ni sjálvari, meðan tað ikki hevði borið til við Sand­oy­ar­tunlinum. Henda ver­k­ætlan­­in er so ein saman­legging av teimum báð­um verkætlanunum og fær tingini onkursvegna at hanga saman, staðfestir Sverri Hansen.
Hann vísir á, at fígg­ing­ar­leist­ur­in við almennum grund­kapitali í einum al­menn­um partafelag er væl kend­ur bæði heimanífrá við Vágatunlinum og Norð­oya­tunlinum og við risaverkætlanum aðara staðir, til dømis Stóra­belts­brúgv­in í Danmark og Oyra­sunds­brúgvin, sum knýtir Dan­mark og Svøríki saman.
- Alt hetta er væl roynt áð­ur, og tá fíggingin skal fáast til vega, skal tað sum við øllum øðrum verkætlanum vigast ímillum, hvussu stór­ur eginpeningurin skal verða, og hvussu nógv skal fíggjast við láni. Tess størri egin­peningurin er, tess minni er váðin, og tess bílig­ari verður so láns­fíg­g­ing­in, sigur Sverri Hansen.

Ein arbeiðsmarknaður
Tó at hann ikki vil siga, um júst henda stóra tunnils­verk­æt­lanin er skilagóð ella ikki, hevur formaðurin í Búskaparráðnum eina hugs­­an um yvirskipaða týdn­­ingin av einum væl út­bygd­um innanoyggja sam­ferðsl­u­kervi.
- Eg vænti í øllum før­um, at Sandoy fær stóra nyttu burtur úr einum tunnils­sambandi, tí annars er vandi fyri, at fólkatalið mink­ar niður í onki har. Sæð yvir tíð er tað eisini gott fyri samfelagið, at øk­ini verða bundin saman, ikki minst tí, at vit tá fáa ein meira samanhangandi ar­beiðs­marknað, og tað er til stórt gagn fyri vinnu­na, sigur formaðurin í Bú­skap­ar­ráðnum.