Í dag verður farið undir nýtt tingár, men áðrenn løgtingið verður sett, fara tingfólk og onnur í kirkju.
Stýrisskipanarlógin sigur, at ólavsøkudag verður farið undir nýggja tingárið, og at politikararnir undan tingsetanini skulu í kirkju og ganga í skrúðgongu.
Skrúðgonga fer í Dómkirkjuna í Havn beint fyri klokkan 11, og síðani verður gudstænasta, har David Johannesen, sóknarprestur, prædikar. Eftir gudstænastuna verður gingið niðan aftur á Vaglið, har kórsangur verður.
Kl. 13 verður løgtingið sett, og so fer Kaj Leo Holm Johannesen at halda sína triðju og í hesum valskeiðnum seinastu løgmansrøðu. Stýrisskipanarlógin sigur, at hann skal greiða frá støðu landsins og tí, sum landsstýrið hevur í ætlan at fremja.
Tað er greitt, at hetta verður síðsti arbeiðsdagurin hjá fleiri tingmonnum. Fleiri av fremstu tingmonnunum hava boðað frá, at teir fara ikki at bjóða seg fram á løgtingsvalinum, sum í seinasta lagi verður í januar.
