Landsliðsskiparin, Ásla Johannesen og liðfelagarnir í Piteå spældu í dag 26. og seinasta dystin í bestu svensku fótbóltsdeildini hetta kappingarárið.
Dysturin var leiktur á Bravida leikvøllunum í Göteborg móti nýklaktu meistarunum, BK Häcken sum hevur havt Jóhonnu Fossdalsá Sørensen uttanfyri við krossbandsskaða.
Piteå beit væl frá sær móti meistarunum, og tapti bert 1-0. Häcken skoraði ikki sigursmálið fyrrenn í 89. minutti.
Piteå endaði á einum níggjunda plássi við 31 stigum.
Ásla hevur fingið fulla spælitíð teir síðstu mongu dystirnar. Hon fekk spælitíð í øllum 26 dystunum, og skoraði tvey mál og legði upp til trý mál í júst lidna kappingarárinum.
