Hetta kappingarárið hevur gingið alt annað enn eftir ætlan hjá FC Keypmannahavn.
Í superliguni duttu teir niður í niðara endaspælið, tí teir ikki megnaðu at vera millum seks tey fremstu liðini í grundspælinum.
Seinnapartin skuldi kappingarárið bjargast í steypafinaluni móti FC Midtjyllandi. Men miðjútlendingarnir fóru við steypinum aftaná 1-0 sigur í Parkini í Keypmannahavn. Han-Beom Lee skoraði sigursmálið í 82. minutti.
Við steypasigri, silvur í superliguni og einum góðum avriki í Evropa kann FC Midtjylland staðfesta eitt gott kappingarár, hóast gullið í superliguni glapp.
FC Keypmannahavn hevur tó eitt skot eftir í byrsuni. Teir vinna niðara endaspælið, og sleppa tí at spæla ein Play Off dyst móti einum liði úr ovara endaspælinum, har eitt pláss í Conference League stendur upp á spæl.
