Seinasta hálva árið hevur tað verið framgongd í lønunum hvønn mánað, og januar var onki undantak, tá tað vóru útgoldnar 520 milliónir krónur í lønum. Hetta er 14 milliónir meira enn í fjør, framgongdin er 2,7 prosent.
Høvuðsorsøkin til framgongdina fyrr í vetur var góða gongdin í hýrunum, men nú í januar vóru hýrurnar lægri enn í januar í fjør. Samanlagt minkaðu lønirnar 3,4 prosent í fiski-, ali- og aðrari ráevnisvinnu.
Hinvegin var stórur vøkstur innan privatar tænastuvinnur, 7,2 prosent, og har var tað serliga sjóflutningur og vinnuligar tænastur, sum áttu vøksturin.
