Fólk kunnu vænta øðrvísi undirhald frá bólkinum PS, tá innleiðandi umfarið í Prix Føroyum verður í Klaksvík í kvøld.
? Tað ber illa til at skelkað fólk longur, tí alt er roynt áður. Men vit ætla at spæla villan tónleik við nøkrum sermerktum tekstum, sigur Jógvan á Høvdanum, yngri, sum er frontfigurur í bólkinum.
PS spælir harðan rocktónleik, og helst fer onkur av yrkingunum at arga ávís fólk.
Gulli er við
Umframt PS verða tveir aðrir lokalir bólkar við í Prix Føroyar kappingini í KÍ-høllini.
Gulli Johansen, sum eisini var við fyri tveimum árum síðani, fer hesaferð at spæla undir navninum Human Caos. Gulli fæst mest við harðan rocktónleik, og hesaferð verða eisini modernaðir tónar í tónleikinum.
Harafturat verður bólkurin IRIS úr Klaksvík eisini við.
Drúgvar royndir
Skal tosast um nakran favoritt at vinna kappingina í Klaksvík, má All that Rain nevnast.
Hetta er bólkur, sum er mannaður við limum úr bólkinum Kjølar, sum áður hevur staðið seg sera væl í Prix Føroyum. All that Rain eru væl samanspældir, og teir hava drúgvar royndir á palli.
Bólkurin Tám er eisini mannaður við royndum tónleikarum, og Sólvá Ford er sangari í bólkinum. Daybreak úr Havn er mannaður við dugnaligum tónleikarum, og hesin bólkurin kann fara at gera rættiliga vart við seg í árins kapping.
Bólkarnir Krit og Líla Rúm úr Havn og Hokus Pokus úr Nólsoy verða eisini við í kappingini í kvøld.
Ongar glasfløskur
Prix Føroyar kappingin verður hildin í KÍ-høllini, og dyrnar verða latnar upp í kvøld klokkan 20.30, og fyrsti bólkurin fer á pallin klokkan 21.30.
Serliga valdir dómarar fara at gera av, hvørjir tveir bólkar sleppa við í finaluna, sum verður í Norðurlandahúsinum í apríl mánaði.
Fyrireikararnir hava sett forboð fyri, at fólk taka glasfløskur við til tiltakið, tí hesar fløskur hava verið til ampa í fyrstu tveimum innleiðandi umførunum.
