Seinast hetta tiltak varð fyriskipað var í 2019, tá eisini fyrrverandi bassleikarin Paul Newton, var serligur gestur hjá Deiggj. Í ár verður, umframt Uriah Heep temaið, eisini eitt Deiggj-tema, umframt annað, ið deiggjararnir hava spælt seinnu árini - eitt nú Gasolin og okkurt annað krem frá 70'unum.
Deiggj høvdu í september tvær stórar konsertir, sum báðar vóru útseldar. Tann fyrra í SALT á Tvøroyri og hin á tiltakinum Rokkur í Vestmanna á Vestmanna døgum. Nú er túrurin so komin til Gjáar.
Easy livin' við Gjógv var fyrstu ferð fyriskipað í 2015.
– Tiltakið leggur upp til hugna og at taka tað róligt saman við vinum og kenningum og góðum klassiskum rock'n roll tónleiki, siga fyriskipararnir.
– Føroyingar kring alt landið hava leitað sær til Gjáar, at minnast og fagna tónleikinum frá 70'unum og nú eisini nýggjari løg hjá Deiggj, sum hava rundað tey fýrati.
– Tiltakið er fyrst og fremst ein konsert, men tað er loyvt at dansa til hittini hjá Uriah Heep og Gasolin drøna av pallinum í Bygdarhúsinum.
Gissur Patursson, plátuvendari, verður eisini á pallinum og spælir dansivinarligan tónleik frá 70'unum.
Nógv verður aftur gjørt burturúr at hugna og prýða Bygdarhúsið og skapa tann rætta 70-ára stemningin, eitt nú við livandi ljósum, lavalampum, plakatum og øðrum.
(Mynd: Finn Larsen)