Avgerðin hjá íslendsku stjórnini at rinda aftur kreppulánið úr Føroyum sæst aftur, nú roknskapurin fyri landskassan er gjørdur upp.
Sambært roknskapartølunum hjá Fíggjarmálaráðnum var undirskotið hjá landskassanum 31,2 milliónir krónur í fjør. Tá er afturrindaða lánið á 300 milliónir krónur íroknað.
Tað merkir sostatt, at undirskotið hjá føroyska landshúsarhaldinum hevði verið 331 milliónir krónur í fjør, uttan afturrindaða lánið úr Íslandi.
Føroyar vóru fyrsta landið, sum veitti Íslandi fíggjarliga hjálp, tá landið kom út í fíggjarligt ódnarveður á heysti í 2008. Tær 300 milliónirnar vórðu latnar Íslandi sum eitt rentu- og avdráttarfrítt lán.
Í desember í fjør gjørdi íslendska stjórnin av at rinda lánið aftur, pengarnir eru bókaðir í roknskapin fyri 2012, sum tí einans hevur 31 milliónir krónur í undirskoti.
Í 2011 var undirskotið hjá landskassanum, sambært roknskapartølunum, 312 milliónir krónur. Og í ár verður undirskotið á fíggjarlógini umleið 250 milliónir krónur.
