Skotska stórfelagið úr Glasgow, Rangers, hevur í dag kunngjørt, at Steven Gerrard verður nýggjur venjari í felagnum. Fyrrverandi liðskiparin hjá Liverpool hevur seinastu tíðina verið ungdómsvenjari í barndómsfelagnum.
- Tað er eitt risa felag og tá boðið kom, var eg ikki í iva. Eg fekk eina kenslu av, at hetta er nakað serligt og at Rangers er fyri meg, sigur Steven Gerrard á tíðindafundinum í dag.
Gary McAllister, sum millum annað hevur verið í Føroyum í samband við ein fótbóltsskúla, verður hjálparvenjari.
- Eg havi spælt saman við Gary McAllister og kent hann síðani vit spældu saman í Liverpool. Eg eri ikki ein royndur venjari, men Gary hevur verið í spælinum leingi, sigur Steven Gerrard.
Rangers og Celtic hava í nógv ár verið stóru feløgini í Skotlandi, men seinastu árini hevur Rangers havt stórar fíggjarligar trupulleikar og felagið er farið á heysin. Nú er felagið aftur í bestu deildini. Rangers er nummar trý, nú trý umfør eru eftir. 23 stig eru upp til Celtic.
