Lagið er gott á jóansøku. Seinnapartin vunnu genturnar umborð á Firvaldi og menninir umborð á Tvørabátinum. Og í kvøld hevur TB trumfað við at vinna 3-2 á heimavøllinum við Stórá ímóti EB/Streymi. Eftir 1. hálvleik stóð á jøvnum 1-1.
Vongverjin í høgru Carl Mikkjal Bech legði TB framum, tá ið eitt korter var farið. Tað var eftir innlegg úr vinstru frá liðformanninum Rógva Joensen.
Tíggju minuttir undan hvíldini javnaði EB/Streymur. Málskjútti var liðformaðurin Niels Pauli Danielsen, sum var fyrstur á, eftir at TB málverjin Ivan Stojkovic hevði hálvbjargað.
Sjey minuttir eftir steðgin varð Albert Adu, sum leingi hevur verið skaðadarvaður, skiftur inn á TB liðið, og ein tími var farin, tá ið hann legði TB framum aftur. Rógvi Joensen royndi seg við skoti av brotsteigarmarkinum, bólturin brast í stólpan, og Albert Adu var fyrstur á bóltinum, sum hann við høvdinum stýrdi í málið, ið var tómt, tí Jákup Andrias Hansen, sum í kvøld var málverji hjá EB/Streymi, hevði tveitt seg út ímóti stólpanum fyri at bjarga.
Sum tað leið fram ímóti dystarenda spenti EB/Streymur álopsbogan, og tað bar við sær eitt av trýsti. Men tað var TB, sum økti til 3-1. Málskjútti var Teitur Justinussen, sum við høvdinum stýrdi bóltin í málið eftir innlegg úr høgru.
Carl Mikkjal Bech varð vístur av vølli, tá ið tað bara restaði ein heilt lítil løta, og so varð TB undirmannað. Dómarin legði fýra minuttir aftrat, og tá skoraði EB/Streymur. Andras Olsen, sum plagar at vera miðverji, men í kvøld var fremsti maður, stýrdi eftir innlegg bóltin í málið við høvdinum. Dómarin bríkslaði fyri síðstu ferð, áðrenn bólturin varð givin uppaftur. Harvið vann TB 3-2.
Úrslitið ber við sær, at TB nú er ellivu stig frá niðurflytingarsstrikuni. TB hevur sama stigatal sum ÍF, sum er á sætta plássi við 20 stigum. Málmunurin hjá bæði ÍF og TB eru 0. ÍF hevur skorað 28 mál, og TB hevur skorað 23 mál.
EB/Streymur er aftast við 6 stigum. Tað eru átta stig fram til áttanda plássið og FC Suðuroy, sum eisini hevur væl betri málmun enn EB/Streymur.
Næsti dysturin hjá TB verður 27. juli ímóti Víkingi á útivølli. Sama dag skal EB/Streymur spæla á heimavølli ímóti KÍ.
TB-EB/Streymur 3-2 (1-1)
1-0: Carl Mikkjal Bech
1-1: Niels Pauli Danielsen
2-1: Albert Adu
3-1: Teitur Justinussen
3-2: Andras Olsen
Dómari: Páll Augustinussen
TB: Ivan Stojkovic - Carl Mikkjal Bech, Reynir Magnússon, Teitur Olsen, Andri Freyr Björnsson - Martin Tausen, Heine Mortensen - Patrik Johannesen, Rógvi Joensen, Eirikur Magnusarson Ellendersen - Teitur Justinussen
EB/Streymur: Jákup Andrias Hansen - Ragnar Danielsen, Egil á Bø, Marni Djurhuus, Árni G. Olsen - Ólavur F. Eidesgaard, Brian Olsen, Rógvi E. Nielsen, Jens Michael Jensen - Niels Pauli Danielsen, Andras Olsen
Støðan
B36 36
NSÍ 34
Víkingur 33
HB 30
KÍ 25
ÍF 20
TB 20
FC Suðuroy 14
AB 8
EB/Streymur 6
18. umfar
Mánadagin 27. juli
AB-NSÍ
EB/Streymur-KÍ
Víkingur-TB
Ólavsøkuaftan
B36-ÍF
Ólavsøkudag
HB-FC Suðuroy
